Thalgrabenchörli

Zämegwürflet us Sängerinne u Sänger vo jung bis jungblibe, isch ds Thalgrabechörli e Gruppe Lüt, wo vor auem eis wichtig isch: d Fröid am zämä singe. Natürlech gäh mer üs o Müeh schön z Singe, aber vor auem muess es vo Härze cho. Das zeichnet das Chörli us u so göh mer o mitenang um.

​

Mir singe vorwiegend Jodulieder u öppe o Jütz, so wie äuteri u nöieri Mundartlieder u Männerchorlieder. D Tatsach, dass dä Verein ursprünglech isch e Männerchor gsy, schimmeret mängisch no düre. Ömu we mer de öppe ume einisch es Lied us aute Zyte usem Ordner näh. Üser äutere Sänger chöi die o nach Jahre eifach ume singe u erinnere sech o no a d Wort. Auti Erinnerige a Uftritte wärde aube ume ganz läbig u die jüngere Sänger dörfe so a mängger, meischtens luschtige, Episode teilha. Wie dir dene Wort chöit entnäh, verloufe üser Singprobe nid geng top seriös, es wird viu glachet u Witz wüssi mer sicher nach dr Prob o dr eint oder anger meh.

​

Aui wo nöi y das Chörli chöme, wärde härzlech empfange u aube «unger d Fäcke» gnoh vo de Sängerinne u Sänger wo öppe ir glyche Stimm singe, für ne häufe dry z cho.

Üser Probe göh vo 20.00h -21.30h. Mir probiere chly effiziänt z probe, so dass bym 2.Teil aui öppe no eis chü cho zieh, us ne nid scho z spät isch.

​

Dä Teil isch drumm de grad so wichtig: es paari zücke d Jass-Charti die angere mache mitenang «gsundheit» (das geit o mit e me Kafi crem) u dr Nöischt muess natürlich o verzeut sy. U de gits no die, wo süsch nie Schnupfe, aber nach dr Singprob scho…

O gsunge wird ir Gaschtstube meischtens no… u siges nume Lumpeliedli.

Churz, mir sy es Tschüppeli Lüt, wo enang wichtig isch, u s gärn luschtig u gmüetlich het. We mer de mit üsne Lieder no öpperem dörfe e Fröid mache, macht üs das glücklich u zfride.

​

Zu üsem Chörli ghöre ono: